دعوة بعنوان #مش_عايزين_منكم_حاجة
النهاردة وانا بقلب في الفيس لقيت أكتر من حد مشير حاجات عن ارتفاع أسعار اللحوم لقرب رمضان وأن الكيلو وصل ل٩٠ جنية
وكنت من فترة بسمع كمان ان اسعار الطيور زادت بشكل ةغير مسبوق بس كنت بعتقد ان دا مجرد رد فعل لزيادة سعر الدولار مقابل الجنية
لكن الغير مسكوت عنه ان الاسعار ترتفع بالشكل الجنوني دا من غير ما يبقي فيه أي مراعاة للناس اللي أحوالهم المادية صعبة واللي دخلهم مش بيتناسب مع الاسعار دي
انا من النهاردة هعمل مبادرة #مش_عايزين_منكم_حاجة
قاطعوا التجار اللي بيبيعوا اللحوم والطيور لأنهم مش بيزيد عليهم حاجة هما بينتهزوا فرصة ان اي زيادة في اي عملة بيعمل عدم توازن لمرتبات الموظفين وبيبدأوا يعلنوا اشاعة مبدئية عن زيادة الاسعار ويزيد السعر من ١٠ جنية ويتدرج بعدها لزيادة ممكن توصل ١٥٠٪ يعني لو الكيلو في العادي ب٦٠ جنية بيبيعوه هما ب١٨٠ جنية ودي حصلت في سنة من السنين ولما لقيوا الناس بتشتري بردو عجبتهم اللعبة فعاثوا فيها فسادًا
تعالوا نزود دخول البسطاء
فيه سيدات ربات بيوت بيربوا الطيور على اختلافها وبعض الحيوانات القابلة للذبح
اه بتربيها عشان تستعين بيها على الغلاء اللي بيبقي في المواسم
ليه منروحش نتفق معاهم اننا هنشتري منهم بسعر التجار اللي كان قبل ما يزودوا الاسعار دي
السيدات دي ممكن يدخلها مبلغ كويس من الفكرة دي هي أولى بيه من أي تاجر مستغل
لو حد فيكم يعرف سيدة بتربي طيور أو حيوانات قابلة للذبح اتفقوا معاها وقاطعوا التجار المستغلين
واللي بيعملوا شنط رمضان لما تجيب طيور اتفق مع سيدة عندها مشروع
تربية البيت مضمونة بردو
مفيش احسن من انك تنعش اقتصاد شخص بيحاول يساعد نفسه
خليه كمان يساعدك و واجهوا سوا استغلال التجار وزيادة الأسعار
اللي فيكم يعرف ناس بتربي الطيور والحيوانات القابلة للذبح ينشر طريقة التواصل معاهم
وانا هكون أول واحدة تنشر القائمة لما تكتمل عشان نقدر نساعد سواء أسرة لها دخل أو حتى مجموعة خير هيعملوا شنطة رمضان لأسرة معدمة
فكروا فيها كويس وعلقوا ببيانات الناس اللي تعرفوهم خلوهم يفرحوا مرتين
تعليقات
إرسال تعليق